敬請期待

逢星期四做 live,但搞錯時間,以為 1 點開始,點不知原來 11 點,拍檔利世民高明,早已開波,我足足遲咗 40 分鐘,罪過罪過。

邊手機連線,邊沖返杯咖啡,戴返隻 AirPod 就入埋去做 live,Restream 呢個工具係有佢過人之處。

做 live 唔出樣、齋講嘢嘅好處,係唔會有 camera shy 之餘,個人可以周屋行嚟行去,雙手可以 free 出嚟做其他嘢⋯⋯ 嘅可以上網睇資料,或者去廁所出恭,肚餓起嚟碌個麵都仲得。

咁同利世民吹水,梗會講到 Web3(節目個名叫 w3nomics),然後提起啲 NFT 痴晒線,佢就話:「好多朋友問起,我寫書個進度⋯⋯ 其實我想講,寫一本書,嗰份責任同壓力,根本大到難以置信,我認為要寫一本書,要有本書會長命過我自己嘅心態。」

意思係,而家啲人搞 NFT,根本係「隨波逐流」式做法,即好似當年 Fb page 開始 monetize 之後,就一窩蜂去開 page 做圖抽水、後尾 Fb 改演算法鼓勵做 live,大家又走去 Fb live,輪到 YouTube Channel 叫做有錢揾,又係齊齊去 YouTube 度做 KOL 月旦時事。

其實我同意。但想當年,即係 2007 左右,我跟利世民揾食、係報紙寫稿嗰陣,當時出最多暢銷書嘅出版社,都揾過我地「結集出書」,用報紙出過嘅文章,再加新寫一啲文,叫做「新曲 + 精選」咁樣出書。

查實當年 Fb 未成氣候,喺報刊有地盤嘅作者,其實多少有屈機嘅成份,出版社揾我地,都可以話只係「follow the money」,唔係咩難理解嘅一回事,咁嗰本書叫做《Web 2.0 大引爆》。

嚴格嚟講,Web 2.0 呢個 term 係 Tim O’Reilly 係 2004 年嗰陣時提出,公認嘅時期,就大約係之後個十年,直至到 2014 年左右,我哋係 2007 年出咗本書,都可以話食正條水,出版社就算唔大賺,都至少唔使輸錢。

但其實,我覺得而家叫開始咗 Web3,今時今日至係最適合嘅時間,至有足夠嘅體驗,去到回顧返成個 Web 2.0 時代,寫返本書嚟到結案陳詞,究竟 2004 到 2014 嗰十年,甚至連埋之前 Web 1.0 嗰個時代,一啲屬於香港自己嘅科網/創科嘅歷史。

嘿嘿,其實我想講嘅係,我而家做緊嘅事之一,就係寫緊一本咁嘅書,連名都未改,但會係一啲未來值得重温、一啲有歷史價值、有所謂「replay value」嘅故事同埋註腳,大家敬請期待。

迴響已關閉。

在 WordPress.com 建立網站或網誌

向上 ↑

%d 位部落客按了讚: