真實的人生

一行禪師圓寂了，享年95歲。
佢曾提醒世人，活得儉樸，至可以體驗生命嘅奇妙同美好。
令我諗起舊東家一位長輩，大家都叫佢主席。主席年輕嗰陣，執掌過大電視台，位高權重，叱咤風雲。
佢俾過啲相我哋睇，相入面，佢去咗啲第三世界國家，親身玩AK47同射火箭炮，係真嘅火箭炮⋯⋯
咁軍火呢家嘢，我都有玩過，係《Battlefield 1942》入面我仲揸過坦克添。
有次飯局，我問佢：「主席，你退休之後，仲有咩想做？」點知佢笑笑口話：「其實我準備好隨時死㗎喇。」
「頂你吖！」我當時心諗，我連點生存都未搞掂，你老人家已準備好死？
其實每個人都知，自己終有一死，但絕大部分人選擇「唔諗」。
但總有啲人例外，例如得道嘅佛教徒。佢地會每日問自己：「係咪今日？準備好未？我人生一切都盡力了嗎？是否問心無愧？」
當然佛家所講嘅，以我理解，更在於是否「真實嘅人生」，有冇付出「正確的努力」，係咪好似主席咁璀璨，抑或一行禪師咁儉樸，反而並唔係最重要。
最重要應該係，去到生命最後嗰一刻，諗返轉頭，呢生人係咪過緊一個自己真正想要嘅生活。
或者，學識咗點樣準備死亡，就會知道應該如何生活。