科技霸權唔易做

本欄才寫過 HTML5不久，分別賣書及賣電影的 Amazon和 Walmart，真的推出 HTML5網站，繞過 iTunes Store的抽佣政策，相信所有不滿 Apple霸權的朋友，這次都一齊拍爛手掌。

點解 Apple係霸權？任何公司或集團，喺任何範疇有壟斷嘅地位，有佢講冇人講，基本上都會被稱為霸權。 Apple喺唔止一個行業地位舉足輕重，早兩個月推出嘅 in-app subscription，又要求所有商家若經 iTunes上客，就必須同佢哋分享 30%收入，聽落真係幾惡，唔俾人話霸權就怪。

之但係，今次暗渡陳倉嘅 Amazon同 Walmart，何嘗唔係另一個範疇嘅霸權？ Amazon係實體書同電子書市場，幾乎趕絕傳統書商同出版商， Walmart係世界上最大嘅僱主，與其說成功扳倒 Apple，倒不如說霸權間嘅角力。事實上，問每個做生意的，都想成為一方霸主，盡量避免有後來者競爭，這樣生意才能長做長有，股東利益才有保障。

不過，互聯網與生俱來係最自由最開放嘅地方，喺網上做生意，要做到有地產、醫生、律師之類嘅霸權同壟斷地位，係唔可以單靠傳統方法，透過跟政府打交道或立法去保護自己行業利益。想做互聯網霸權，相對而言，要靠真本事打江山。

舉個例，科技界開發軟件和開發遊戲等，很明顯就不是霸權類的生意模式，一來開發軟件人人可以做；二來大部份軟件和遊戲的生命周期很短暫，很快被同類產品取代，一個 iPhone軟件即使很多人下載，估值都無法計算得好，換個說法，實情在互聯網時代做內容，很難成為霸權。

相反，建基於技術、社群、平台等模式的生意，像 iTunes、 Amazon、 Google、 facebook等公司，越早跑出越有利，別人就算有錢，想學想追，連門路都沒有，這樣才有可能成為科技霸權。

2011年8月13日刊於蘋果日報