最近 Google+係威係勢，推出冇幾耐，已突破千萬用戶，所用時間，又比起 facebook為少，外國傳媒自不然大事報道，再加上早兩個月， facebook被踢爆出錢請專人唱衰 Google，搞到全世界覺得 facebook怕咗 Google。但事實上，互聯網 bad mouth對手這種事，絕對唔係第一日有，問題以 facebook咁大間公司，將呢項高危任務假手於人，實在並非明智的決定。
有日遇上公關 J，大家於互聯網認識，其公司專門做博客推廣，專門幫品牌與企業的博客落廣告同鱔稿，業務遍佈亞太區，但進軍香港就一年都未夠。跟他談論 Google+與微博這類網上新玩意，應該搶佔不少博客的風頭及流量，問及他有沒有受到影響，誰知他好樂觀表示公司「大把彈藥」，而且於新加坡、馬來西亞等地已做到佔據七、八成市場佔有率，雖然香港遲起步，但勝在廣告市場需求大，難就難在本地博客數量未算多，而且並未太接受付費寫文的模式。
與公關 J一席話，令我想起科技界一個定律，某種技術或標準，最賺錢的時候，通常是有另一個新標準跑出，話要取代舊有標準的時候。例如 3G，開始賺錢時，正正是 4G推出的時候，又例如手機 Apps公司開到成行成市，但其實 Html5正是取替大部份簡單 Apps，而且勢將必行，但事實上，品牌與企業對於這方面的需求，往往有滯後的現象。
換言之，家做博客推廣未算遲，雖表面上似乎 facebook、微博、 Google+玩晒，然而爛船總有三斤釘，本地博客推廣市場，似乎尚處於開發期，仲有大把商機。
換個角度，作為一個博客，如果唔係純粹以寫日記心情寫文，寫了幾年，未見有任何商機，就咁就放棄，結果當市場同機會來臨嘅時候，其實都幾可惜，所以無論創業或者做任何事，捱過初期的悶局，絕對是成功的一個關鍵。
2011年8月6日刊於蘋果日報
尹思哲 