又一個樓市見頂指標

早前報章頭條談及三個 80後任職地產代理，有百萬年薪，不少網民博友群起而攻之，認為勢必助長地產霸權的氣燄。我反而想，這是否樓市見頂的訊號？傳媒是民情的探針，經驗告之，每逢傳媒接二連三高調報道市場的亢奮，都有可能是潛在的見頂訊號。

事實上，根據最新的數字，本港地產代理持牌人數量已達 31674人，是地產代理監管局成立以來新高。同時，地產代理的分行的數量，又較去年同期增加 19%。於未來的 6月份，又將有地產營業員資格考試，由於需求上升， E牌的考試費由 6月起加價 16%，盛惠 700元，至於 S牌亦加 12%，收費 450元。如果加價之後，想入地產行搵食的考生人數，依舊破晒紀錄，相信將會又是另一個樓市見頂指標。

提到年輕人入行做地產代理，記得頭條的其中一位主角，將一二手樓盤資料、相片及影片載入 iPad，方便客戶未親身睇樓之前，用 iPad先睇一趟。他這招，特別受年輕買家歡迎。適逢上周我寫 Zillow的時候，得知原來遠在美國，亦有調查顯示，超過 73%的業主，較鍾意搵支援網上播片睇樓的代理放盤。理由很簡單：美國地方大，遠不如香港般交通方便，睇樓頗為費時，上網先睇片有助減低交易成本。但估唔到，原來連香港都有這個現象。值得一提是，現在只要有一部 iPhone在手，已有唔少 App支援一按拍攝全景相（ 360 Panorama），全景相的像真度，介乎於照片和影片之間，相信適合部份覺得拍片麻煩的業主和地產代理。

唔知幾時開始，部份人混淆了「搵食」和「拜金」兩個概念。所謂拜金，是那些將鑽石鑲滿了車頭，目的為了炫耀；至於搵食，在最初是為生活，再進一步，是為了走自己的路，達成自己嘅目標，財富只是副產品。兩者的分別，在於盲目與否，有沒有自己的目標。還是受訪那個女仔講得好，佢話：「唔知自己要咩，冇清晰目標，就叫失敗，相反就是成功。」搵食啫，犯法呀？

(2011年4月30日刊於《蘋果日報》)