本月28號,Google出新招「GoogleAppsforYourDomain」,以前開一間公司,首先要建立公司網站及電子郵件,成本係買伺服器、伺服器軟件及網頁寄存服務。以後,唔理邊個,只要有一個Domain(互聯網網址),其他由Google一手包辦晒,仲係唔使錢。

於是,有人認為微軟、IBM及Oracle這些靠商業軟件搵食公司,定必首當其衝。不過思哲認為未必,畢竟,他們主要收入,來自大企業或政府機構。相反,Google這次目標,卻係中小型或個人公司。反而網頁寄存服務,很有可能變成夕陽工業,不過Google此招一出,卻反證了以往一個非常錯概念:「免費等如冇value。」例如免費電郵不及企業電郵、免費軟件不及商業軟件、博客比不上記者之類。

再說,梅鐸去年用5.8億美元買下交友網站myspace.com,又係免費服務。現時,myspace全球流量排名第六,係Google.com.hk14倍、同類型網站friendster.com4倍多(資料來源:Alexa.com)。friendster當年嫌Google出手太低,拒絕4000萬美元的收購,今日喊都無謂。

以上列舉的網站,其共同點在於:「免費服務,靠廣告搵錢。」咁myspace呢種服務型網站,會唔會有朝一日搶晒Google同Yahoo!生意?未必,本月初,Google與myspace簽約,未來三年代理晒myspace廣告,而Google代價,就係支付myspace不少於9億美元費用。平均一年3億美元,以現在myspace約一億會員(未計增長人數),一人每年幫Google賺3美元,真係有幾難?

而Google這招「化敵為友」,代理埋myspace廣告,一來可以增加廣告收入,二來進一步將MSN同Yahoo!在互聯網廣告市場邊緣化,還「對沖」了社群網站對Google的正面衝擊。MSN惟有與美國第二大社群facebook結盟,至於Yahoo!,更加無晒計,最近請一大班學者加盟,話要研究互聯網使用者行為,睇有咩新商機。唔知班學者有結論之後,互聯網廣告市場份額,仲剩番幾多呢?

2006年08月30日刊於《蘋果日報》

Advertisements