馬會應買晒聯賽播映權

馬會應買晒聯賽播映權

英超開鑼一星期未到，電視廣播（0511）旗下無收費電視高調宣布，未來三屆的英超播映權志在必得。香港人對英超情有獨鍾，其獨家播映權特別值錢。有分析員認為，有線寬頻（1097）要保住呢塊「鎮台之寶」，至少要花10億。

上禮拜一，有線公布中期業積，至06年6月30日，收費電視客戶七十七萬。以10億元留客，成本不過每人約130元，本來無傷大雅。其收費電視業務ARPU（即每戶每月平均收入）雖然下跌3%，但仍有209元。弊在互聯網及多媒體業務的ARPU，亦下跌6%至163元。有線3000幾個員工，出糧已經使4.3億，比05同期升9.3%。經營盈利8625萬，比去年同期跌44.7%。未計花買西甲播映權的1.3億，仲有歐洲其他聯賽…為英超豪擲10億，是否明智之舉？

不過，保唔住英超播映權，即使慳番10億，有線睇怕都五勞七傷。10萬收費電視客以ARPU209元，當合約期18個月計，將合共失去逾3億元收入。不要忘記，對手擅長交叉銷售，該10萬客的收費電視及寬頻收入將被一併搶走。另一水源廣告，估計減2.34億收入，股值最終難免受壓。總之，有線呢鋪慳又死，唔慳又死。

思哲大膽建議，馬會不如一次過買晒所有聯賽的播映權，然後免費任由各台聯播，索性大家都唔使爭。條數點計？香港人去年花成千億進行合法賭博，賭波投注額已經佔313億。其實，除最熱門的歐洲聯賽外，其他地區，例如非洲、日本等國際賽事非常缺乏，甚至沒有轉播頻道。免費得到四大聯賽播映權的條件，就是必須播放其他冷門賽事，同埋「官方」賠率，實行一家便宜幾家（台）。

以後要爭客，唔該用高質素節目去爭。總之，球迷成為最後得益者，咁就皆大歡喜。

2006年08月23日刊於《蘋果日報》